September 17, 2021, nagkatigum ang atong MDRRM Council ug COVID-19 Crisis Team nga naglangkob sa atong mga opisyales sa lungsod, mga barangay kapitan, mga ahensya ug institusyon, department heads, ug section heads para sa usa ka meeting. Kini gipahitabo sa Manat Gymnasium ug gipangunahan sa atong EOC Manager ug MDRRM Officer nga si Jennifer F. Echavez.

Malipayong gipresentar ni Ma’am Echavez ang bag-ong kapitan sa Poblacion nga si Barangay Captain Cyrian Reterba, ug ang bag-ong myembro sa atong Sangguniang Bayan, Hon. Debie G. Tan.

Pipila sa mga nahisgutan sa maong meeting ang estado sa atong lungsod dala sa nagkataas nga kaso sa COVID-19.

Subay sa atong Municipal Health Officer, Dr. Danielo O. Rubillos, 58 sa mga nagpositibong kaso anaa karon sa atong TTMF ug 15 niini, anaa sa hospital. Anaa na lamang sab sa 29 beds ang available sa atong TTMF sa Nabunturan National Comprehensive High School. Sa kasamtangan, nisaka sa 807 ang total nga kaso sa COVID-19 sa atong lungsod, ug 85 niini ang aktibong kaso.

Sa laing bahin, mapasalamaton si Dr. Rubillos nga hapsay ug padayong nagmalampuson ang atong vaccination kung asa anaa sa 700 hangtod 1,200 ang mabakunahan kada vaccination schedule. Hapit na sab kita magpagawas ug vaccination certificate nga internationally recognized na, ug kini i-iskedyul para malikayan ang pagdagsa sa tawo ug mamintinar ang mga health protocols kontra COVID-19.

Para sa mga anaa sa lagyong lugar o walay igong budget sa pagbyahe ug pagpatambal, usa ka maayong balita ni Dr. Rubillos nga sunod semana, pagasugdan na ang telemedicine sa atong health center, kung asa pwede magpa konsulta ONLINE.

Malipayong gipahibalo usab ni Dr. Rubillos nga ang Department of Health XI, nakadungog gayod sa atong mga panginahanglanon ug andam mugahin ug dugang medical personnel sa atong health center pinaagi sa paghatag ug dugang isa ka doctor.

Gihisgutan usab sa mga myembro ang protocol sa kalag-kalag nga mamahimong magpabilin sama sa atong gipahigayon sa niaging tuig.

Gianunsyo sa atong Supervising Officer sa BPLEE, Ma’am Gilda Aldaya nga kung adunay mga balayrunon sa atong sementeryo, pwede na muduol sa atong BPLEE nga nahiluna tapad sa Mayor’s Office, para masusi ang balayrunon ug mabayaran na kini daan.

Gipaabot sab ni Ma’am Alma Delia Besana nga dalaon sa atong mga Senior Citizen ang ilang mga Vaccination Card sa payout karung September 27 hangtod October 1, 2021.

Sa katapusan, mapasalamaton si Mayor Chelita C. Amatong sa presenysa sa atong mga kapitan, department ug section heads, representante sa mga ahensya, ug institusyon; anaa usab ang atong mga konsehal nga sila Hon. Carlo Ancla ug Hon. Conie Caballero. Mensahe niya nga magpabilin lamang sa kakugi ug pagpaningkamot para sa atong mahal nga lungsod.

Dugang ni Mayora, wala pa gayod kita nahuman, busa pagahugtan pa nato ang pag-implementar sa mga minimum standard health protocol ug magbinantayon kita sa atong komunidad. Ang atong pagtambayayong karung panahona, hugot nga importante usab, busa magtinabangay kita.