September 9, 2021, giimbitahan sa atong halangdong Mayor, Chelita C. Amatong ang opisina sa Department of Public Works and Highways (DPWH) nga gipangunahan ni Engr. Tristan Barry Nistal uban ang mga representante sa Barangay Sta. Maria nga direktang naapektuhan sa isyu kabahin sa nagpadayong proyekto nga nisubay sa Nabunturan-Mainit Park Road.

Anaa usab ang presensya sa atong maabtik nga konsehal sa lungsod, SB Alim Sotto uban ang mga kaubanan ni Brgy. Kagawad Verulo C. Javinez (Committee on Infrastructure) sa Sta. Maria.

Gipanguluhan ni Mayor Chickay ang maong panagtapok para masolusyonan ug mahataga’g pagtagad ang mga mulo sa atong mga residente sa Purok 7, Sta. Maria nga adunay dakong kabalaka sa pagtaas sa tubig kung adunay kusog nga pag-ulan.

“Ang volume sa tubig ang akong gikahadlokan. Kakaya ba ang atong box culvert nga mudawat sa volume sa tubig gikan sa Alvania? Mao sab na ang ilang gikahadlokan, kay kung mu overflow, sa ila man sab mupaingon,” saysay ug pagpasabot ni Mayora.

Pipila sa mga solusyon nga gihatag ni Engr. Nistal mao ang desilting ug dredging. Pwede usab mapadak-an ang kanal sa tuong bahin. Makatabang usab nga padak-an ug palawman ang sapa, ug siguraduhong walay gapnod mabilin diha para paspas ang pag-agi sa tubig. Dugang usab ni Engr. Nistal, ang proyekto para sa zone protection, kini nga lakang naga-sigurong dili mag-erode ang kanal.

Gipahimangnuan usab ni Mayora ang mga opisyales sa barangay nga siguraduhong dili mabarahan ang kanal. Ug kung mag-ulan, i-take note gayod ang mga naobserbahan para mapaabot dayon sa DPWH, para makahatag sila ug rekomendasyon kung unsay angay buhaton.

Sa laing bahin, gipasibaw usab ni SB Alim ang laing isyu sama sa delikadong dalan nga pagaagihan sa mga manimbahay padulong sa simbahan [INC] ug pauli inig human ug samba, nga delikado para sa mga bata ug residente. Nanghinaot si SB Alim nga mapangitaan kini ug paagi sama sa pagbutang ug gamayng dalan nga adunay mga signages.

Isip progresibong lakang, personal nga mubisita ang DPWH team uban ang atong barangay representatives para makita ang mga panginahanglanon sa mga residente sa Purok 7 ug mahatagan kini’g solusyon.