POLISIYA SA LTO GIHISGUTAN KAUBAN ANG REPRESETANTE SA LTO

September 9, 2021, nakauban nato ang mga representante gikan sa Land and Transportation Office nga sila Sir Mark Joseph Piccio ug Sir Anjo J. Magañan, Team Leader Region XI para sa usa ka forum nga gitambungan sa atong mga TODA, barangay captains, riders ug uban pang adunay mga pangutana ug interes kabahin sa mga polisiya sa LTO.

Ang maong forum gi-organisa sa atong inahan sa lungsod, Mayor Chelita C. Amatong aron pasabton ang mga draybers kung nganong adunay dakop, mga rekisitos sa pagparehistro, polisiya ug unsay pangitaon inig dakop, ug para mahataga’g kalinaw ang nagakalat nga tungod kini sa atong lokal na panggamhanan.

Saysay ni Mayora, “Tumong nato nga magtagbo ta. Ug madunggan ang first hand information gikan sa LTO. Nanghinaot usab ako nga muapil mog isplikar sa inyong kaubanan ug magpahibalo sa unsay angay andamon.”

Kini, pipila lang sa mga nahatagag kalinaw nila Sir Piccio Ug Magañan, kung asa gipasabot nila nganong adunay dakop ug unsa ang mga klase sa violation.

Gihatagan usab nila ug empasis nga dili makapanghilabot ang atong LGU sa mga balaodnon nga ipang implement sa LTO. Kini nagpasabot nga dili muagi ang LTO sa atong lokal na panggamhanan para mananghid nga manakop, apan kini usa sa ilang mandato ug trabaho nga walay kalabutan ang LGU.

Sa pagtubag sa kasagarang pangutana nga nganong kusog manakop si LTO, gipakita ni Sir Piccio ang datos sa LTO kung asa adunay 16, 366 nga unregistered motor vehicles sa Nabunturan. Ug 143,378 sa kinatibuk-ang probinsya sa Davao de Oro. Busa, mas daghan ang dakop. Ubay-ubay sab ang deputized diria sa atong lungsod nga manakop kompara sa laing lungsod.

Gipasabot usab nila nga dili lang kini sa Nabunturan, apan nagatuyok usab sila sa 10 ka laing mga munisipyo sa atong probinsya.

Ang pinaka tumong usab sa maong pag implement sa mga balaodnon, mao ang pagseguro sa kaluwasan sa atong mga draybers nga mahilayo sa delikadong disgrasya, ma-regulate ang kadalanan, ug madisiplina kita hilabina kung anaa sa dalan.

Atong pagtimbaya usab sa presensya sa atong konsehal, Hon. Alim Sotto ug Hon. Glenn Arangcon nga anaa usab sa maong forum ug nagpakita sa ilang suporta. Gipaabot usab ni SB Alim ang plano sa mga konsehal ug Bise Mayor sa atong lungsod sa Nabunturan sa pagsuwat sa nasyonal nga mahataga’g panahon ang atong lungsod nga mupahuway usa sa pagpanakop tungod sa kapait sa panahon dala sa pandemya. Kini human makita nila nga nag lisod gayod ang mga residente tungod sa COVID-19.

Para sa dugang kasayuran ug mga pangutana, pwede kita mubisita sa Facebook page sa LTO Davao de Oro, o mu-contact niining mga numero: 09096468173.