TURNOVER & BLESSING OF BRGY. TAGNOCON FOOTBRIDGE

September 30, 2021, pormal na nga gi-turnover sa lokal nga panggamhanan sa Nabunturan ang proyekto nga hanging steel bridge sa barangay Tagnocon niining lungsod.

Malipayong gi-turnover sa LGU Nabunturan nga gipangulohan ni Mayor Chelita Amatong ang hanging steel bridge nga proyektong gihangyo sa mga opisyales sa Brgy. Tagnocon ubos sa pagdumala ni Kap. Felix Diwata, alang sa mga lumulupyo niini hilabi na sa mga residente sa Purok 2 niining barangay.

Ang maong proyekto gi-gahinan sa lokal nga panggamhanan ug P 900,000.00 apan mikabat lamang kini ug P 808,000.00 sa gipahitabong bidding hangtud sa kini nahuman. Tungod niini nag desisyon si Mayor Amatong nga pabutangan ug solar lamp post ang foot bridge sa dili madugay alang sa kaayuhan ug kaluwasan sa mga moagi niini matag gabii.

Dako ang pasalamat sa mga lumulupyo sa barangay Tagnocon sa lokal nga panggamhanan, ug sa kanhing konsehal sa lungsod, Mr. Jose Anayo Jr., nga maong nag donate sa luna aron matukod ang maong proyekto.

Mitambong usab sa maong okasyon sila Vice Mayor Rodel Balili, SB members Hon. Glenn Bonbon Arangcon ug Hon. Debbie Tan, ug Engr. Thelma Gisma sa Municipal Engineering Office.

Nanghinaut si Mayor Amatong nga ampingan sa mga residente sa Tagnocon ang footbridge ug dili pasagdan, kung aduna may mga guba o diperensya,mamahimong ipahibalo dayon sa opisina niini aron hinanaling maaksyunan.