EXECOM Meeting para sa tuig 2022, Gipahitabo

Gipahitabo ang pinaka-unang Executive Committee kon ExeCom Meeting sa tuig 2022 kaniadtong Enero 7-8, 2022 pinanguluhan sa atong Mayor, Chelita “Chickay” Amatong.

Ang maong komitiba naglangkob sa mga department ug section heads sa Lokal nga Panggamhanan sa Nabunturan.

Pipila sa mga importanteng gihisgutan mao ang mga panglantaw, katikaran, ug plano sa mga opisina para sa tuig 2022. Ubos sa padayong pagsunod sa minimum standard health protocols, gipaningkamutan sab sa matag opisina nga malahutayong mapahitabo ang nagkadaiyang programa ug aktibidades.

Gipaminaw sab ni Mayor Amatong ang mga panginahanglanon sa mata’g opisina, gikan sa mga ekwipo para sa mas epektibo ug episyente nga pagpanerbisyo ug mga dugang personahe arun mutabang sa nagkabug-at nga trabahuon sa opisina.

Gawas ana, gipasigarbo usab sa matag opisina ang nagkadaiyang accomplishments sa nilabayng tuig, 2021 bisan paman sa hagit sa pandemya.

Isip mensahe, gipaabot ni Mayor Amatong ang iyang kinasingkasing nga pasalamat sa suporta ug kadasig nga gipakita sa matag opisina. Paningkamutan usab niya nga mahatag ang mga nagkalain-laing panginahanglanon para sa kalambuan ug kaayuhan sa lungsod sa Nabunturan.