Ubos sa liderato ni Mayor Chelita C. Amatong, gipahitabo ang pinaka-unang MDRRM Council Meeting ug COVID-19 Crisis Team Meeting sa tuig 2022 kagahapong adlawa, January 10, 2022 sa Municipal Covered Court.

Gilangkuban ang meeting sa atong mga kapitan sa baynte otso (28) ka mga barangay, mga department ug section heads sa atong LGU, mga national agencies, ug institusyon. Nitambong usab si SB Conie Caballero ug SB Mark Anthony Chan.

Usa ka annual report ang gi-presenta ni Ma’am Jennifer Echavez, MDRRMO, nga nagpakita sa mga aktibidades, programa ug pag-responde sa LGU sa tuig 2021.

Gipahibalo usab ni Dr. Danielo O. Rubillos ang reopening sa TTMF agi’g pagpangandam sa posibleng pagsaka sa kaso sa COVID-19 sa atong lungsod. Mahinumduman nga gisirado usa kini tungod sa zero case kaniadtong bulan sa Disyembre, apan tungod sa hinay-hinay nga pagsaka karong mga semanahuna, nakita ni Dr. Rubillos nga mas maayong andamon ang maong pasilidad.

Gawas ana, gihisgutan ug gisabutan usab sa konseho ang mga importanteng lakang ug pagasundong guidelines nga ipagawas sa usa ka EO karung umaabot nga mga adlaw.

Sa laing bahin, ubos sa tinguha ni Mayor Amatong nga mubalik ug mutabang sa mga naapektuhan ni Bagyong Odette sa Surigao, nangayo ug pagtugot ang atong MDRRM Officer sa mga myembro sa konseho sa paghatag ug tabang nga nagkantidad ug 200 Thousand nga ipalit ug tambal ug uban pang panginahanglanon sa mga biktima sa bagyo nga naglisod hangtod karon.

Uban sa coordination sa Philippine Red Cross-Davao de Oro Chapter, nibisita ang atong MDRRM Officer dala ang Mobile Kitchen sa lungsod padulong sa apektadong lugar, pipila lamang ka adlaw human sa pagpanamastamas sa bagyong Odette. Og nakita gayod niya ang kalisod sa sitwasyon sa mga residente sa maong lugar. Busa, hugot gayod ang pagtugot ni Mayor Chickay nga mubalik ug mutabang sa mga apektadong residente.

Andam na usab ang ipadalang 56 ka sakong bugas gikan sa atong mga Barangay Kapitan sa Nabunturan. Apil na niini ang cash ug clothing assistance nga nalikom sa NALGEU, pinangunahan ni Ma’am Gilda F. Aldaya, NALGEU President.

Nangandam usab ang atong Motorcycle Club Municipal Federation ug mga kahon-kahong relief goods nga ilang ipanghatag.

Kinahanglan gayod ang pagtinabangay hilabina sa panahon sa kalisod, ug naga paningkamot gayod atong lungsod nga makatabang sa bisan unsang paagi. Mapasalamaton usab kita sa tanang kinasingkasing nga nihatag para sa atong mga kaigsuonang naapektuhan sa bagyo.

Isip mensahe, gidasig ni Mayora nga mas magpakalig-on pa ug mag-igmat karung panahona. Pagakusgan usab ang monitoring para malahutayon natong matagamtaman ang kagawasan nga atong nasinati karon. Kinahanglan usab muingon gayod kung adunay gipamati ug dili na hulaton nga ma-grabehan pa.

Nagalaum si Mayor Amatong nga magmalampuson kita, inubanan sa pag-ampo ug pagtinabangay.