Karung adlawa, Enero 24, 2022, ang Lokal nga Panggamhanan sa Lungsod sa Nabunturan nagpahigayon ug Misa Pasalamat ug Convocation pinanguluhan sa atong halandong Mayor, Chelita “Chickay” Amatong.

Usa sa mga announcement gikan sa atong MDRRM Officer, Jennifer F. Echavez mao ang pagpahibalo sa bag-ong Alert Level sa atong lungsod ug sa tibuok probinsya sa Davao de Oro, nga Alert Level III.

Ubos sa maong Alert Level, gibawalan na ang Contact Sports (sama sa Basketball ug uban pa) Face-to-face nga klase, pag-operate sa mga amusement parks, mga lugar nga adunay live voice, panagtipok sa mga indibidwal nga naggikan sa laing household, ug gaming establishments sama sa sabungan.

Magpabiling pagatugutan ang mga meeting, apan kinahanglang fully vaccinated ang tanang motambong.

Kabahin sa panahon, gi-anunsyo usab ni Ma’am Echavez ang pagsulod sa Low Pressure Area, kung asa ang lungsod sa Nabunturan ug Compostela, uban ang kasilinganang dapit makatagamtam ug hinay hangtod sa kusog nga pag-ulan.

Sa laing bahin, adunay anunsyo usab si Dr. Danielo O. Rubillos kabahin sa status sa COVID-19 cases sa lungsod kung asa nagasaka gayod ang atong kaso. Saysay ni Dok Rubillos, padayon ang pagsaka sa kaso nga dili mubaba sa lima kada-adlaw. Sa karon, aduna kita’y 64 nga positibong kaso, busa iyang gipahinumduman ang mga empleyado nga dili mag kumpyansa.

Gi-reiterate usab ni Dok Rubillos ang executive order ni Mayor Amatong kung asa, ginabawalan ang mga empleyado nga mu-duty kung adunay ginabati nga simtomas sama sa ubo, sip-on, o kalintura, kung dili mu-undergo ug Rapid Antigen Test (RAT). Gihangyo gayod niya ang pagkamatinud-anon ug pagkooperar sa mga tagsa-tagsang opisina para malikayan ang pagkuyanap sa maong virus.

Usa ka makalingaw nga exercise activity usab ang gipangunahan sa atong mga talentadong Nabunturan Emergency Response Team.