Bisan paman sa kusog nga pag-ulan dinala sa Low Pressure Area (LPA), nagpadayon ang COVID-19 Crisis Team Meeting nga gipahitabo sa Municipal Covered Court karong hapona.

Ubos sa meeting agenda, gituki sa grupo ang mga bag-ong patakaran ubos sa Alert Level 3 ug ang status sa kaso sa mga nagpositibo ug COVID-19 sa lungsod.

Gipangunahan ni Ma’am Jennifer F. Echavez ang maong meeting ug ubos sa Alert Level 3, ania ang mga guidelines nga angay sundon: https://www.facebook.com/nabunturanlgu/posts/238921121746485 ubos sa Executive Order No. 08, series of 2022 nga gipirmahan ni Mayor Amatong karung hapona.

“Nagka-ALARMING na,” mao kini ang gipasibaw usab ni Dr. Danieol O. Rubillos sa nagasakang kaso sa COVID-19 sa lungsod. Sa karon, nisaka na sa 59 ka kaso ang mga nagpositibo sa virus kung asa, 15 ang anaa karon ug na-admit sa DDO-PH Montevista, 11 gawas sa TTMF, ug 33 nga anaa karon sa atong TTMF/MIU.

Base sa datos, kinahanglan gayod nga mas pagahugtan pa ang MONITORING sa matag barangay. Kung mahimo, i-report dayon ang mga indibidwal nga adunay simtomas arun ma-test para dili na mukuyanap ang maong sakit.

Sa padayong pagsaka sa atong kaso diri sa lungsod sa Nabunturan, giawhag ang tanan sa pag-kooperar sa atong Lokal na Panggamhanan ug kung aduna may gipamati, mag-isolate lang usa kung mamahimo.

Gidasig usab ni Mayor Amatong ang mga kapitan nga mas pakusgan pa ug doblehon gayod ang mga pagpaningkamot para sa pagkunhod sa kaso. Dili usab angay magduha-duha nga mureport kay anaa ang atong Lokal nga Panggamhanan nga andam mutabang.

Nitambong usab sa maong meeting sila SB Alim Sotto ug SB Debie Tan.

Mag-amping, mag-ampo, ug mag-igmat kita sa kanunay, Nabunturanons!