Ang paghatag ug bili sa kinaiyahan, kadaugan sa tanan! Kini ang gipakusgan sa atong Lokal nga Panggamhanan sa Nabunturan ubos sa pagtambayayong sa opisina sa Environment Resources Section ug Municipal Disaster Risk Reduction and Management kung asa, usa ka simultaneous Tree Planting ang gipahitabo sa Barangay Linda ug Basak karong adlawa.

     Subay sa temang: Invest in Our Planet. “Act in a Bold Way, Innovate in a Broad Way, and Implement in an Equitable Way,” gitanom sa mga participants ang Malibago trees ug Native trees nga nagahandom nga mutabang sa pag-protektar kanato gikan sa soil erosion, global warming, ug pagbaha.

     Nasugdan ang Tree Planting sa Barangay Basak kaniadtong tuig 2019, kung asa nagtanom kita ug Malibago trees sa riverbank sa Purok 2 aron mapugngan ang soil erosion.

     Kini nga riverbank stabilization project sa EMS ug MDRRMO gipadayon karong tuiga, ug malipayon kitang makita nga ang natanom sa nilabayng duha ka tuig nanubo na.

     Anaa ang Nabunturan Emergency Response Team ug mga empleyado sa nagkadaiyang opisina sa atong LGU nga nakiglambigit sa Earth Day 2022.

     Sa laing bahin, nagmalampuson usab ang gipahitabong tree planting sa Barangay Linda nga giapilan sa mga myembro sa Sangguniang Kabataan ug mga kaubanan nato sa Action Against Hunger. 200 ka native trees sama sa bagras, tindalo, bitaob, barobo, yakal, ug uban pa ang natanom sa maong lokasyon.

     Mapasalamaton usab ang LGU sa kanunayng suporta sa Action Against Hunger sa mga inisyatibo ug programa niini. Sila nang-apod apod usab ug libreng snacks ug bonnet sa mga participants sa tree planting.

     Tinuod gayod nga nagka-grabe na ang epekto sa Climate Change, ug kini mabati tungod sa irregular nga klima ug mga natural disasters nga atong nasinati. Busa, ubos sa usa ka sustainable ug malahutayong pag-atiman sa kinaiyahan, kini nga back-to-back Tree Planting initiative dakong lakang na gayod alang sa pagpangandam sa umaabot pang panahon.