Usa ka Misa alang sa limpyo ug malinawong eleksyon ang gipahinungod sa Lokal nga Panggamhanan sa Nabunturan alang sa umaabot nga National ug Local Election sa Mayo. Busa, gihalad kini para sa pag-ampo nga magmabungahon ang umaabot nga eleksyon, inubanan sa pasalamat sa labawng Makagagahum sa atong tagsa-tagsang kinabuhi. Gihalad usab ang pag-ampo nga dili masayang ang matag boto isip susi alang sa hayag ug progresibong kaugmaon, dili lamang sa lungsod sa Nabunturan apan sa tibuok nasod sa Pilipinas.

     Atong pag-ampo usab alang sa tanang kandidato, gikan sa mga Presidentiables ngadto sa pinakaubos nga posisyon, nga aduna gyo’y matinud-anon nga tumong ug maayong panglantaw alang sa ilang gingsakpan. Hilabina sa mga running candidates sa probinsya sa Davao de oro, ug sa atong lungsod sa Nabunturan. Pagabantayan ug pagalamdagan unta sa labawng Makagagahum ang atong lungsod para sa limpyo ug malinawong eleksyon ug ipalayo kita sa kagubot.

     Human sa misa, gipahitabo usab ang 4th Monday Convocation alang sa bulan sa Abril sa Municipal Grounds nga gitambungan sa mga department/section heads ug empleyado sa lokal nga panggamhanan. Adunay gamayng pahalipay usab ang Opisina sa Municipal Engineer alang sa tanang mga nagselebra sa bulan sa Abril, kung asa giharanahan usab ang mga birthday celebrants.