Usa ka national evaluation sa Anti-Smoking Program sa Lungsod sa Nabunturan ang gipahitabo karong adlawa, Mayo 24, 2022.

     Gipanguluhan kini ni Ma’am Risa, Consultant for Red Orchid Awardees sa Gerry Roxas Foundation, inubanan nila Sir Rommel R. Arriola sa Action on Smoking and Health Philippines; ug ni Ma’am Rosemarie Basañez sa Department of Health Region XI. Anaa usab ang mga personahe gikan sa Provincial Health Office-Davao de Oro.

     Gipahitabo ang ebalwasyon aron masukod ug mahibaluan ang impact sa Red Orchid Award nga nadawat sa lungsod sa Nabunturan nga usa ka Red Orchid Awardee sulod sa tulo (3) kasagunson nga mga katuigan.

     Layon usab ni Ma’am Risa nga masayran ang Best Practices sa lungsod nga makatabang sa pagmugna ug mga polisiya alang sa implementasyon sa Anti-Smoking Program.

     Ang Nabunturan lamang sa tibuok Mindanao ang napilian sa grupo, ug posibleng rason niini mao ang maayo ug maanindot nga pamalakad sa Anti-Smoking Program niini taliwala sa pandemya; ang pagdaog niini matag tuig isip Red Orchid Awardee sukad 2018 hangtod 2020; ug kini lamang ang lungsod nga adunay Barangay Red Orchid Awardees sa baynte-tres (23) gawas sa baynte-otso (28) ka barangay niini.

     Busa, gipasigarbo ni Dr. Rubillos inubanan sa mga myembro sa Anti-Smoking Task Force ang nagkalain-laing best practices sa lungsod, sama sa:

1. Pag-hire ug usa ka Consultant nga maoy nitutok sa hapsay nga organisasyon ug implementasyon sa programa;
2. Synchronized Oplan Dakop, Pulot-Upos, Baklas, Pahibalo, ug planning activities sa 28 barangays;
3. Tanang barangay, adunay Anti-Smoking Ordinance nga naka-angkla usab sa Municipal Ordinance No. 10, series of 2020 kon “The New Comprehensive Anti-Smoking Ordinance of 2020 of Nabunturan, Davao de Oro;
4. Pagmugna ug mga programa sama sa 88 days menu;
5. Full support gikan sa mga stakeholders, barangay captains uban ang konseho niini, ug mga myembro sa Task Force;
6. Pakig-coordinate sa youth sectors sama sa SK ug Youth Development Council; ug uban pa.
Mapasalamaton usab si Dr. Rubillos sa suporta sa opisina ni Mayor Chelita C. Amatong, ug sa pakig-alayon sa mayora sa kampanya sa Anti-Smoking nga adunay dakong epekto sa kaayuhang panglawas, ekonomiya, ug kinaiyahan sa lungsod.

     Human sa deliberasyon, dako ang pasalamat ni Ma’am Rose sa kooperasyon ug pagpaningkamot sa lungsod sa Nabunturan ug sa tibuok Anti-Smoking Task Force, ug saysay niya, usa gayod ang Nabunturan nga instrumento sa pagmugna ug mga polisiya nga adunay dakong tabang sa tibuok nasod.