Usa ka Executive Committee Meeting ang gipatawag ni Mayor Myrocel Clarin-Balili karung adlawa aron mahisgutan ug mapaabot niya ang mga nagkadaiyang programa ug proyekto nga gustong matutukan sa iyang administrasyon.

     Pinanguluhan ni Sir Freddie Coronica, ang bag-ong Municipal Administrator sa Lokal nga Panggamhanan sa Nabunturan, inubanan sa mga department ug section heads sa lokal nga panggamhanan, gituki sa komitiba ang musunod nga agenda:
1. Mensahe ni Mayor My-my ug ang iyang mga Flagship Program;
2. Ang pag-iskedyul sa ipahitabong Executive-Legislative Agenda;
3. Ang Budget Preparation alang sa tuig 2023; ug ang
4. Updates sa pag-selebra sa Araw ng Nabunturan.

     Usa sa highlight sa maong meeting ang paghatag ug gibug-aton ni Mayor Clarin-Balili sa nagkalain-laing development sectors. Una, ang Economic Development nga naglangkob sa paghatag ug dugang suporta sa mga mag-uuma sa lungsod. Samtang sa Health Development, gilauman niya ang pagbuhat ug mga COVID-19 Control mechanism; paghatag ug libreng maintenance medicines alang sa mga Senior Citizens ug PWDs; pagduso sa Health Center Expansion Project; ug pag implementar sa Universal Health Care Law.

     Dugang pa, ubos sa Institutional Development, hatagan ug pagtagad sa iyang administrasyon ang pagkab-ot sa Cityhood, kung asa mamahimong syudad na ang Nabunturan. Gihandom usab niya ang pag-butang ug State College ubos sa pakig-alayon sa nagkalain-laing stakeholders ug ang pagpatukod ug bag-ong munisipyo/city hall.

     Tungod sa iyang gugma ug pagbati sa katawhan, pakusgan niya ang paghatag ug mga Skills Training for Livelihood Projects sa mga nanginahanglan ug ang dugang land acquisition alang sa mga informal settlers kon relocation projects ubos sa Social Development.

     Sa laing bahin, gihataga’g pagtagad usab sa iyang administrasyon ang pag-develop ug pag-protektar sa kinaiyahan pinaagi sa pag-improve sa sanitary landfill services ug waste collection management. Dakong importansiya usab sa Infrastucture Development ang gihatag, kung asa ipadayon ang Water System Development Projects, Master Drainage Plan Preparation, ug dugang barangay road assistance.

     Alang sa kalambuan, iyang hataga’g bili usab ang pag-review sa management mechanism ug pag-improve sa mga pasilidad sa public market, terminal, ug uban pang opisina sa Economic Enterprise.

     Human sa paghatag sa iyang mga flagship programs and projects, nadungog usab ni Mayor My-my ang mga panginahanglanon ug suhestyon sa nagkalain-laing opisina ug ahensya nga andam mutabang aron mapadayon ang kalambuan sa lungsod sa Nabunturan.

     Ubos sa agenda sa maong meeting, nadiskusyonan usab ang mga lakang alang sa pag-selebra sa ika-65th Araw ng Nabunturan sa umaabot nga Hulyo 23, 2022 kung asa, gipangandaman na usab sa matag opisina ang ilang nagkadaiyang responsibilidad alang sa malahutayong selebrasyon niini.