Gipahitabo karong adlawa ang maiden/inaugural session sa 21st Council sa Nabunturan nga gipanguluhan ni Vice Mayor Rodel G. Balili uban ang Sangguniang Bayan Members. Anaa usab ang pamilya ug kapikas sa atong mga opisyales nga nisaksi sa maong espesyal nga adlaw.

     Ang session gitambungan ni Mayor Myrocel Clarin-Balili, kung asa, giawhag niya ang mga opisyales nga magtinabangay alang sa kalambuan sa Nabunturan. Iya usab gipaabot ang iyang tinguha nga malampusong maayo ang isyu sa tubig ug masugdan na ang proyekto. Gawas ana, gihataga’g importansiya usab sa iyang administrasyon ang Cityhood ug ang paghatag ug dugang serbisyo sa katawhan.

     Sa ilang privilege speech, gipadayag ni Hon. Atty. Carlo Ancla ang iyang mga plano nga matabangan ang mga mag-uuma. Gawas ana, padayon gihapon ang iyang mga libreng serbisyo legal ug maspakusgan pa niya ang mga tumong alang sa agrikultura.

     Sa laing bahin, prayoridad ni Hon. Ivi Sarah Humol ang pag-streamline sa serbisyo ug mga balaod nga adunay dakong tabang sa mga kabataan, kababayin-an, katiguwangan, ug solo parents. Madasigon usab niyang gipangandaman nga makabuhat pa ug daghang pamalaod ug polisiya nga adunay dakong tabang sa mga marginalized.

     Mapasalamaton usab si Hon. Francis Secuya sa tanang suporta ug pagsalig nga iyang nadawat sa katawhan sa Nabunturan sa iyang pinakaulahing termino. Matod pa niya, dili lamang mu-legislate ang usa ka konsehal, apan usahay kinahanglan usab manguna sa pag-implementar.

     Sayod sab si Hon. Glenn Arongcon nga dili sayon ang musunod nga mga katuigan apan saysay niya, magpadayon gihapon siyang maningkamot aron matuman ang mga plano ug programa alang sa kaayuhan sa lungsod. Samtang, madasigon usab si Hon. Jeovy Mandin nga masugdan na ang mga polisiyang angay ipanday aron mapalig-on pa ang kaayuhan ilabina sa sektor sa edukasyon.

     Usa ka invigorating speech usab ang gitanyag ni Hon. Barrie Mencidor kung asa, inubanan sa iyang kaalam sa ug experience sa pagpanday ug mga polisiya ug legislative agenda sa nasyonal, mas maduso niya ang mga polisiya ug aktibidad ngadto sa mauswagong Nabunturan.

     Gihatagan usab ni Hon. Debie Tan ug gibug-aton ang mga panginahanglanon sa mga katawhan nga anaa sa grassroots. Isip barangay captain, sayod siya sa mga isyu ug concern sa barangay level ug paningkamutan gayon niyang mahatagan kini ug tingog.

     Tinguha usab ni Hon. Alim Sotto nga mapaduol pa ang gobyerno sa katawhan ug mapalig-on pa ang mga sektor sama sa LGBTQ+ ug OFWs.

     Sa pagtapos, mapasalamaton si Vice Mayor Rodel G. Balili sa tanang nipaluyo ug nihatag ug suporta, inubanan sa iyang kapikas, Mayor Myrocel Balili.

     Mapasalamaton usab siya kay Mayor Chelita “Chickay” Amatong sa pagpalambo sa lungsod ug sa mga nasugdan niining kaayuhan ug programa. Isip challenge sa bag-ong administrasyon, gipadayag niya ang tiunay nga dedikasyon ug paninguha nga mapadayon kini ug mas mapalambo pa.

     Iyang giawhag usab ang tanan nga magkahiusa alang sa katumanan sa mga plano ug kaayuhan alang sa lungsod sa Nabunturan, hilabina sa plano sa administrasyon nga makab-ot ang Cityhood.